"Ein laurdagskveld hausten 1973, sat eg på ein gymnashybel og høyrde ”For venner av gammeldans” i NRK. Framfor meg låg den første fela mi, som eg hadde gjort dei første gnagande taka på. Interessa for den tradisjonelle gammeldansemusikken var vekt. Orkesteret som spela i radio denne kvelden, blei helt ”magisk” for meg. Slåtteval og framføring var så briljant og fengande på same tid, at eg mest fekk lyst til å legge fela på hylla for godt, først som sist. Så god gjekk det aldri an å bli!"
Det var mitt første møte med trønderorkesteret Hilmar Alexandersen og P. A. Røstads kvartett.
Seinare i livet fekk eg gleda av å møte dette orkesteret, og sjølv gjere opptak med dei for NRK, ja til og med spele nokre tonar i lag med dei. Eg fekk stadfesta at ”min første kjærlighet” ikkje var utan grunn. Dette var kanskje dei finaste gammeldansmusikarane ein kunne tenkje seg.
Ikkje for det, frå før hadde vi glitrande gode gammeldansorkester frå Gudbrandsdalen – og vi hadde Asmund Bjørkens kvartett og Sven Nyhus kvartett frå Trøndelag. Men også alle desse bukka djupt og audmjukt då dei fekk høyre kva desse karane frå Innherred fekk til.
Som med all stor kunst er det vanskeleg å sette fingeren på kva det var som utgjorde denne magien. Truleg var det den unike blandinga av usedvanleg dyktige, rutinerte og stilsikre musikarar som her fann kvarandre. Her stemde liksom alt. Det unike i samspelet er m.a. korleis trekkspela følgjer felespelet, og korleis det svingar av heile orkesteret.
Og det utrulege er at det ungdommelege felespelet vi høyrer her, er laga av ein ”gubbe” på over 70 år! Med det burde ikkje undre oss. Både før og seinare har det norske folk fått vitnemål om den fenomenale felespelaren frå Steinkjer. Innan norsk folkemusikk er Hilmar Alexandersen (1903– 1993) rekna som ein av dei fremste, ein triveleg kar som spelte berre betre og betre, heilt til han la ned fela for godt, 90 år gammal. Alexandersens karriere er nedteikna mange stader, og der finst både plater og ei mengde NRK-opptak med han.
Gardbrukar og trekkspelar Petter Andreas Røstad begynte å spele saman med Hilmar tidleg på 70-talet, men den første opptredenen med kvartetten og Hilmar var under festspela i Harstad i 1972. Då var trekkspelar Reidar Aksnes, gitarist Øystein Larsen og bassisten Reidar Krogstad komme på plass.
Så bar det i platestudio med fleire innspelingar framover 70-talet, ved sida av radioprogram, TV og mange speloppdrag over heile landet. ”Slåtter som svinger” var den første, ”Hilmar Alexandersen og P.A.Røstads kvartett” den andre, og så kom fem plater i ein serie kalla ”Gammeldanstreff”, før ein dobbelt-LP avslutta plateinnspellingane.
- Arild Hoksnes
